Spáin er dimm

Stjörnuspekin hefur greinilega sýnt hvað gerist þessa dagana. En brennipunktur nálgast, líkt og í okt.- nóv. árið 1918, þar sem Katla gaus (12/10), drepsótt herjaði á Reykjavík (mið- okt.) í áframhaldandi kuldum (og fínu öskufalli?), Versalasamningarnir voru gerðir (11/11) og nýtt land varð til, íslensk fullvalda þjóð, þann 1. desember 1918. Nú höfum við gert okkar eigin útgáfu af afarsamningum en gætum átt afbrigði af hinu eftir.

Framvindu- stjörnukort lýðveldisins Íslands (1944) sýnir okkur í miðri Plútó- hreinsun, þar sem allt falið kemur í ljós og allt úr sér gengið líður undir lok. Sama á við um stjörnukort Sjálfstæðisflokksins, Plútó tekur hann í gegn núna, þannig að afgerandi svara er krafist og líkur á klofningi eða skýrum línum verulegar.

Ríkisstjórnin verður alltaf að berjast við sitt tvískipta eðli, sbr. stjörnukortið hennar. Hún endar með að verða að taka afstöðu á svona ögurstundu.

Eldurinn í kortinu 28/11 er mikill og Bogmannskraftur eins og ör til breytinga. Ídealismi blómstrar og bylting er í loftinu. Það sem hefur kraumað undir niðri flæðir upp á yfirborðið. Eldgos og jarðskjálftar eru líkleg á þannig stundum. Ef Kötlugos á sér loks stað, þá virðist það „jarðbundnara“ en fyrri gos, meira hraun og minna jökulhlaup, þar sem áður var mikil aska (Vog) og vatnsflóð (Krabbi) en nú er meiri jarðtenging, með Steingeit og Meyju. Þegar álíka afstöður og þessar hafa átt sér stað áður án gosa, þá hafa lægðir orðið krappar, vindar miklir og þjóðlíf róstursamt.

Vinsamlegast skoðið textana, þeir eru í undir Myndaalbúm.

 

Athygli vekur að í síðasta Kötlugosi var Mars 8° í Bogmanni, eins og nú, en Sól, Merkúr og Tungl bætast í hópinn morguninn 28. nóvember nk. Þá voru Júpíter/Plútó saman í vatnsmerkinu Krabba í spennu við Sól/Merkúr/Venus í Vog og tungl í Steingeit. Lýsingin á 8° í Bogmanni er öll um að losa um það sem býr innra. Það kemur upp á yfirborðið.

Unnið á kreppunni á 18 mánuðum

Athugasemdir

[Margrét Guðjónsdóttir, 28.11.2008 kl. 21:10]

Það er flott hvernig þú hefur unnið framvindukortin fyrir 28.11.  þetta er góður data grunnur og gaman að sjá kortin svona saman þ.e. lýðveldiskortið og fullveldiskortið og öll hin kortin líka.  Jæja þá er þessi örlagadagur senn á enda og þó við höfum ekki fengið eldgos í bókstaflegri merkingu þá, en ég hef sjálf upplifað innra "reiðieldgos" yfir fréttum dagsins. og ég er viss um að það hefur hálf þjóðin upplifað líka.

[Fiskurinn, 28.11.2008 kl. 23:44]

Takk, Margrét. Ég gleðst ef ég hef haft rangt fyrir mér varðandi gos. En sú orka er svo mikil og spannar meiri tíma, þannig að dagur eða dagar verða varla afgerandi. Sjáðu svo, manni var strítt þegar ég sagði í kosningunum að ISG stæði með pálmann í höndunum eftir á, en svo kom það á daginn. Mest er þó gaman að velta fyrir sér þeirri orku sem er í gangi á hverjum tíma. Ég skal birta núna ISG framvindukortið og fleira.